واحد واخد على خاطره

واحد واخد على خاطره

أنا واخد على خاطرى كتير منك - 

مانا منك 

ومهما ابعد فى يوم عنك ..

 باتوه فى السكه واشتاق لك 

باحس بحاجه جوايا بتندهلى 

 وباسمع لك

 وبارجع لك ..

 واقول منك 

وبحلم إنى بين حضنك    

كأنى حته من حضنك 

ولّما احزن ..!

 بلاقى الحزن جاى ...

 ...مِّنك

ولّما افرح ..!

 بلاقى الفرح دا ... ..مِّنك

خلاصة كل شئ ...... مِّنك 

 م انا مِّنك ،

 وغصبٍ عنى أو عنك...أنا منك 

رضيتى ما رضيتيش ..  منك 

رضيت ما رضيتشى انا ... منك

عموماً ...

كل شئ قسمه  

وقسمة قلبى إنى اشعر وانا فْ حضنك        

 ببرد شديد 

وتدى حضنك الدافى

لقلب الغير 

وانا اللى قلبى كان مخلص ماليه الخير

أنا الطيب يا ست الناس

مش الشرير !

أنا الشمعه اللى قادتلك طريقك نور .

وانا اللى وعدى كان ليكى صريح جداً 

وكان على نور 

وفى الآخر ..

أنا الغلطان !

عشان باوعد وكان وعدى على أدى 

أكون غلطان ؟

عشان الصدق كان ردى

 أكون غلطان ؟

عشان ما قدرتش ازرعلك جناين كدب

 مرويه  بأحلى كلام 

عشان ما عرفتش ابنيلك 

قصور جدرانها  م الأوهام 

عشان ما رضيتشى أتجمل

 ولا اتحمِّل 

أشوف الحب متعزب

خيوطه دايبه فى الأحلام 

أكون غلطان ؟ 

عموماً .. 

كل شئ قسمه 

وانا القسمه ..

 أكون عايش قصاد مِّنك أنا الظالم 

واكون عايش وحيد واغرق 

 فى بحر هموم 

 وانا المظلوم 

رفضت انى أشوف الورده دبلانه ...

 فْ جناين شوك .

 محبتشى تعيش النسمه بردانه 

 فى ليل ضلمه ونهار مخنوق .

بحق الله أنا المظلوم

 بحق الملك والملكوت 

 أنا المظلوم !

باكون عايش على أرضك ..

واشوف خيرك ...

... واموت محروم !

دانا أصعب قرار عندى ..

أكون عايش بعيد عنك 

وأتنفس هوا بايت 

ماهوش منك

بعيد عنك ..

أنا عايش كما الميت 

بَـ اعِد الساعه بالثانيه عشان تِخلَصْ 

باقول للعمر يالله اخلَصْ 

ولا بْيخلَصْ 

كأن الوقت داينِّى ..

وبادعى انُّه فى يوم يخلَصْ 

عشان أخلَصْ

مانا المخلِصْ ..

بدرت الحب حواليكى

جناين ورد بتزهَّر 

بيطلع منها ريح المسك 

والعنبر 

وصفِّتها بشجر أخضر

 رفعت الحب فوق منك سما عاليه ...

 ... وْمَلِتها نجوم 

فى وقت الضلمه بتنور 

وكنتى انتى الدفا والبرد

وكنتى انتى فْ صلاتى الفرض 

وكنتى انتى لقلبى الأرض 

بقيتى انتى الوطن ليا .

ومين يقدر يخون وطنه ؟

عموماً ..

 كل شئ قسمه

وقسمة قلبى إنى افضل 

مجرد كلمه فى حكايه

وقسمة قلبى إنى احزن 

وامّوت حزنى جوايا 

وجايا تقولى دلوقتى 

لولاكى انتى ..

ما كنت فْ يوم هاكون شاعر!

ولا هابقى مابين الناس 

 أنا الشاعر !

 وإيه يعنى ...

  م انا منك

 وكل كلامى كان ليكى

... وكان منك 

هاتيلى حد فى مكانى يشوفك زى ماشفتك 

ولا يتوهشى فى لون عينك ويتغرب

ويتعذب 

ولا يكتب ؟

عموماً ..

كل شئ قسمه 

   أبوطامع

كان عايش عمره يخاف م الموت

والخوف عمال بيزيد جواه 

فى الآخر....

        مات  .

لكن مات م الخوف . 

أبو طامع شد حزام الموت على وسطه

 وهات يافكيك

وانده :

      " أبوطامع "

                ماتردش

ماهى عادتك دايمًا 

  بتغيب وتغيب 

والاقيك بتجهز شنطك

واسأل

      وتقوللى مسافر

وتغيب وتغيب والشوق بيزيد

توحشنى كتير

          والاقيك قدامى 

                 وتقول أنا جيت

بتسافر سهوه وتحضر سهوه

حتى امَّا تموت ؟

 بتموت على سهوه

آه يابن الموت

طب كنت إدينى أمارة

ماناكنت امبارح سهران وياك 

سايبك وش الفجربتضحك

ولا كان شيئ فى الدنيا يهمك 

ولا حتى الموت

كان حبة كحة يجولك

كنت تكح وتضحك وتشد الدخان على صدرك

وتقول :

        خليها تسلُّك

آهى سلكت يا"أبوطامع"

                       سلكت خالص

واتاريك خواف وانا مش عارف

تعرف وانا شايلك 

كان أول مرة أشيلك 

وانا عند الدكتور

حسيت إنك أتقل واحد فى الدنيا

شايلك وانا بضحك

عمال أتأمل شكلك 

علشان .

       وقت مانرجع

كنت أعايرك بالشيلة

 وقت مانسهر واحنا بنضحك

عمرى ماكنت أصدق 

إن اللى بيحصل يحصل

كان نفسى ارجع بك ماشين .

أوحتى مساندك .

        لكن شايلك !!

مش ممكن .

تعرف وانا راجع 

شيلت هموم الدنيا معاك